Cyd-Bwyllgor Addysg Cymru (CBAC)

Welsh Joint Education Committee (WJEC)

Cafodd CBAC ei sefydlu ym 1948, yn wreiddiol fel consortiwm o awdurdodau addysg lleol. Mae erbyn hyn wedi ymsefydlu fel prif ddarparwr gwasanaethau addysgol yng Nghymru, yn eiddo i'r 22 o awdurdodau unedol ac yn cael ei reoli ganddynt. Mae'r gwasanaethau a ddarperir yn cynnwys: arholiadau i ysgolion, hyfforddi tiwtoriaid / athrawon a chynhyrchu deunyddiau dysgu / addysgu Cymraeg.

Mae CBAC yn darparu 4 cymhwyster yn benodol ar gyfer oedolion sy'n dysgu Cymraeg fel ail iaith, mewn cyfres o'r enw 'Defnyddio'r Gymraeg'. Mae'r 4 wedi eu hachredu gan gorff rheoleiddio'r Cynulliad, sef ACCAC, ac yn gweithredu'n unol â Chod Ymarfer ACCAC. Yn dechrau o'r haen isaf, dyma nhw:

Defnyddio'r Gymraeg: Mynediad - A2 (ALTE 1)
Defnyddio'r Gymraeg: Sylfaen - B1 (ALTE2)
Defnyddio'r Gymraeg: Canolradd - B2 (ALTE 3)
Defnyddio'r Gymraeg: Uwch - C1 (ALTE 4)

* Mae'r lefelau ALTE / CEFR a nodir eto i'w cadarnhau.

Mae'r pedwar cymhwyster yn profi gallu'r ymgeiswyr yn y pedair sgìl, gyda phwyslais ar y sgiliau siarad / gwrando. Y prif resymau a roddir gan ddysgwyr dros fynychu cyrsiau yw: a. integreiddio â'r gymuned Gymraeg ei hiaith, a b. ar gyfer ei defnyddio yn y gweithle. Felly, mae'r pwyslais yn yr arholiadau a ddarperir ar ddefnyddio'r Gymraeg, ei siarad a'i deall, mewn cyd-destunau cymdeithasol a galwedigaethol. Mae hyn yn adlewyrchu arfer mewn cyrsiau Cymraeg i Oedolion.

Cafodd y ddwy lefel gyntaf eu peilota'n llwyddiannus mewn canolfannau yng Ngogledd a De Cymru yn Ionawr a Mawrth 2003 a chânt eu cyflwyno ar gyfer eu hachredu'n llawn yn Rhagfyr 2003. Gall ymgeiswyr sefyll yr arholiadau mewn canolfannau ar draws Cymru wedi eu trefnu mewn cydweithrediad â darparwyr cyrsiau lleol. Mae arholiad uwch 'Hyfedredd' (C2 / ALTE 5) yn cael ei ddatblygu.

Mae manylebau (yn cynnwys papurau enghreifftiol), llyfrynnau i ymgeiswyr, cyn-bapurau (gyda chasetiau ar gyfer y prawf gwrando) ar gael ar gyfer pob cymhwyster. Mae deunydd arholi a rhagor o wybodaeth ar gael ar wefan CBAC.

Am ragor o wybodaeth ynghylch yr arholiadau Cymraeg i Oedolion, cysylltwch â

Dr Emyr Davies
Swyddog Arholiadau Cymraeg i Oedolion
CBAC
245 Rhodfa'r Gorllewin
CAERDYDD
CF5 2YX
Cymru
UK

Ffôn 029 2026 5009
Ffacs 029 2057 5995
E-bost emyr.davies@cbac.co.uk
Gwefan www.wjec.co.uk